કહેવાય છે કે ડાયાબિટીસની પહેલી વખત જાણ સાઠ ટકા કેસોમાં આકસ્મિક જ થાય છે. આ એક એવો અતિથિ છે જે ગમે ત્યારે – તેને ગમે ત્યારે શરીરમાં પ્રવેશી જાય છે, પણ એક વાર પેઠા પછી માણસ સાથે ‘દગાબાજી’ કરીને તેનો સાથ ક્યારેક અધવચ્ચે છોડી જતો નથી, છેક ચિતા સુધી સાથ નિભાવે છે. એક સમય પડછાયો માણસને છોડીને ચાલ્યો જાય, પણ ડાયાબિટીસ જેનું નામ, બિલકુલ વિશ્વાસપાત્ર દોસ્ત છે.
૨૬. ડાયાબીટીસ અને આંખ
આપણા શરીરના કોઇપણ ભાગમાં એક રાયનાં દાણા જેટલા નાના ભાગમાં પણ લાખો કોષો આવેલ છે. આ બધાં કોષો કોઇ સજીવ પ્રાણીની જેમ પાચન, શ્વસન, ઉત્સર્જન, પ્રજનન વિગેરે કરતાં રહે છે. આ માટે જરૂરી પોષણ તત્વો ગ્લુકોઝ, ઓક્સીજન વગેરે તે લોહીમાંથી મેળવે છે. પરંતુ જો લોહીના ઘટકોના પ્રમાણમાં ફેરફાર થાય જેમ કે ડાયાબિટીસમાં ગ્લુકોઝનું પ્રમાણ વધી જાય છે. શરીરના તમામ ભાગો નાની મોટી બિમારીનો ભોગ બને છે. ડાયાબિટીસને કાબુમાં રાખવા માટે જો કાળજી ન લેવાય તો આંખના જુદા જુદા ભાગો નબળા પડે છે.
ચશ્માનાં નંબરમાં વધારો થવો :-
એક દર્દીના ચશ્માનો નંબર૧-૦ રહેતો તેમાંથી અચનાક ૪-૦૦ નંબર થઇ ગયા. વિશેષ તપાસ કરતાં જાણવા મળ્યું કે ડાયાબિટીસની દવા તેમણે બંધ કરી દેતાં તેમનું બ્લડ સ્યુગર ૩૫૦ એમ.જી થઇ ગયું હતું. આમ ડાયાબિટીસના વધારાની સાથે ચશ્માના માયનસ નંબર (Myopia)માં વધારો થઇ શકે છે.